Career Dreamer LinkedIn-ə Rəqib Ola Bilərmi?

Google-un müxtəlif sahələrdə etdiyi yeniliklər ara kəsmədən davam edir. Bu dəfə isə iş dünyasını hədəf alaraq “Career Dreamer” adlı yeni platforma təqdim edib. İş dünyası dedikdə ağlımıza ilk LinkedIn gəlir. Bəs Google-un irəli sürdüyü bu yeni platforma, LinkedIn-in gücünə çata bilərmi?

 

İş Sahəsində Yeni Platforma

Career Dreamer, Google-un “Grow with Google” təşəbbüsünün bir hissəsi olaraq təqdim etdiyi süni intellekt əsaslı karyera planlaşdırma platformasıdır. O, süni intellektin köməyi ilə istifadəçilərə fərdi karyera yollarını müəyyən etməyə kömək edir. İstifadəçilər öz bacarıqlarını, təcrübələrini və maraq sahələrini daxil etdikdə, platforma onlara uyğun karyera imkanları təqdim edir. Üstəlik, Google-un süni intellekt texnologiyası sayəsində CV hazırlamaq, ön yazı yazmaq və hətta müsahibələrə hazırlaşmaq daha asan olur.

Career Dreamer-ın ən böyük fərqi onun tam fərdiləşdirilmiş yanaşmasındadır. İstifadəçilər platformaya daxil olduqdan sonra süni intellekt onların peşəkar təcrübələrini, maraq dairələrini və şəxsi xüsusiyyətlərini təhlil edir. Daha sonra bu məlumatlar əsasında “Karyera Kimliyi Bəyanı” adlı fərdi bir tövsiyə hazırlanır. Bu bəyanat yalnız keçmiş təcrübələri əks etdirmir, eyni zamanda istifadəçinin gələcəkdə hansı işlərə daha uyğun ola biləcəyi barədə də proqnoz verə bilir.

 

LinkedIn vs Career Dreamer

LinkedIn uzun illərdir iş dünyasında əlaqələr qurmaq və iş imkanlarını qaçırmamaq üçün mükəmməl xidmətlər təklif edən platforma olub. Burada istifadəçilər bir-birilə əlaqə qurur, iş elanlarına müraciət edir və peşəkar inkişaflarını dəstəkləyən paylaşımlar edir. Career Dreamer isə sadəcə bir şəbəkələşmə platforması olmaqdan kənara çıxıb, istifadəçilərin bacarıq və maraqlarına əsaslanan fərdi tövsiyələr təqdim etməklə fərqlənir.

LinkedIn istifadəçilərinə peşəkar çevrələrini genişləndirmək imkanı yaradaraq, aktiv şəbəkələşmə aparmaq istəyənlər üçün əvəzolunmaz platformadır. Digər tərəfdən, Career Dreamer istifadəçilərini fərdi profillərini analiz edərək onlara konkret iş elanları, bacarıq inkişafı üçün kurs təklifləri və hətta optimallaşdırılmış CV-lərlə təmin edir.

Bundan başqa, o süni intellektlə idarə olunduğu üçün istifadəçilərə daha dəqiq və fərdiləşdirilmiş tövsiyələr təqdim etməkdən də geri qalmır. LinkedIn isə daha çox birə-bir insan əlaqələrinə əsaslanır və işəgötürənlərlə iş axtaranların birbaşa ünsiyyətini təşviq edir.

 

Career Dreamer LinkedIn-i Geridə Qoya Bilərmi?

Career Dreamer-ın güclü tərəfi onun süni intellektə əsaslanan fərdiləşdirilmiş yanaşmasıdır. İnsanlar üçün doğru karyera yolunu tapmaq, uyğun kursları təklif etmək və peşəkar inkişaflarını dəstəkləmək kimi imkanlar təqdim etsə də, LinkedIn-in qlobal istifadəçi bazası və uzun illərdir topladığı etibar hələ də ona böyük üstünlük qazandırır.

Hazırda, yalnız ABŞ-da sınaq mərhələsində olan bu platformanın, dünya miqyasında necə qarşılanacağı hələ bəlli deyil. Google-un süni intellektə əsaslanan strategiyası LinkedIn üçün ciddi rəqib ola bilər, ancaq platformaların fərqli yanaşmaları onları iki rəqib etməkdənsə, daha çox imkanlar təmin edən iki alternativ edir.